Psa 64 | YON | STEP | Yook ambo bi ye karub yeman. Dewid ye yook. O God, dabab kandaan ye weng dakmaan kee wengamberewe. Bondanbed ne yaa nande arewa kamiib yaa kee dorondaruwe.

Psalms 64

Yook 64

Yook ambo bi ye karub yeman. Dewid ye yook.

1 O God, dabab kandaan ye weng dakmaan kee wengamberewe.
Bondanbed ne yaa nande arewa kamiib yaa kee dorondaruwe.
2 Arewa kamidanbed nenbandande nuubnaan kami yaa kuu ne nen kimyen yaa kowe,
yi yirinde baandi yaa kui.
3 Yi weng arud dakmi kuu kerewang areb,
kwane yi weng kookiib kuu ana areb dedmone dakmimaib.
4 Yi kuu yenbandi ye biknimbon yirimbed ma ambarakmindoman yaa monbenimaib,
kwane yi kuu uniyiibban kenambun kwane monbenimaib.
5 Yikareb wunonwanon kamem andi ye weng ongmimaib,
yimbed kawaad nong nongkobe bikderebiwen ye dowad dakmimaib,
“Kwane kanembed wedmendaneen? Dowan!” andimaib.
6 Yi kuu wunonwanon kamenib yedmimaib,
“Inamen ongmuwen kuu demkoronmo kii!” andimaib.
Anam kuu nimakarub yi niindem aom meeni kuu karub maambed wedmindeban.
7 Kumban Godbed yi yaa anambed amkandaneen,
kudmeniibban yi kuu yeene ben yiri kiradmaneen.
8 Yi weng arewa kuu yika ikakman mene arewa kerundene monmaraneen,
kwane yi yaa wedmendaniibdan korem kuu korok waaburukme ambon kamendaniib.
9 Kwananeene nimakarub korem kuu unaniib,
kwane yi kuu Godbed kwane ambangkoon yaa dakmenabenib,
kuyaa konomdangmo meenembaraniib.
10 Yorokmodan kuuYariman yaambed kubenib,
yembed kukbimaanbon aombed dobaraniib.
Kane kane yi niindem aom kangdommo doriib kuu ye aningko kankoonime.